ਉੱਤਰੀ ਕੋਰੀਆ ਕਿਮ ਜੋਂਗ ਦੇ ਪੱਖ ਵਿੱਚ 99.98 ਫੀਸਦੀ ਵੋਟਿੰਗ

ਸਿਓਲ – ਉੱਤਰੀ ਕੋਰੀਆ ਵਿੱਚ ਹੋਈਆਂ ਆਮ ਚੋਣਾਂ ਵਿਚ ਦੇਸ਼ ਦੇ ਨੇਤਾ ਕਿਮ ਜੋਂਗ ਉਨ ਨੂੰ ਕਰੀਬ 100 ਫੀਸਦੀ ਵੋਟ ਮਿਲੇ| ਫਿਲਹਾਲ ਸੁਪਰਵਾਈਜ਼ਰਾਂ ਦਾ ਕਹਿਣਾ ਹੈ ਕਿ ਚੋਣਾਂ ਵਿੱਚ ਕੋਈ ਦੂਜਾ ਉਮੀਦਵਾਰ ਅਤੇ ਵਿਰੋਧੀ ਧਿਰ ਨਾ ਹੋਣ ਕਾਰਨ ਉੱਤਰੀ ਕੋਰੀਆ ਵਿਚ ਚੋਣਾਂ ਸਿਰਫ ਸਿਆਸੀ ਦਿਖਾਵਾ ਹਨ| ਉਨ੍ਹਾਂ ਮੁਤਾਬਕ ਇਸ ਤਰ੍ਹਾਂ ਦੀਆਂ ਚੋਣਾਂ ਵਿਚ ਅਧਿਕਾਰੀ ਇਹ ਦਾਅਵਾ ਕਰਨਗੇ ਕਿ ਕਿਮ ਜੋਂਗ ਉਨ ਨੂੰ ਭਾਰੀ ਬਹੁਮਤ ਮਿਲਿਆ ਅਤੇ ਲੋਕ ਉਨ੍ਹਾਂ ਪ੍ਰਤੀ ਵਫਾਦਾਰ ਹਨ|
99.98 ਫੀਸਦੀ ਵੋਟਿੰਗ ਹੋਈ ਜੋ ਕਿ 2015 ਦੇ ਮੁਕਾਬਲੇ 0.01 ਫੀਸਦੀ ਜ਼ਿਆਦਾ ਹੈ| ਉੱਤਰੀ ਕੋਰੀਆ ਦੀ ਸਰਕਾਰੀ ਏਜੰਸੀ ਨੇ ਦੱਸਿਆ ਕਿ ਜਿਹੜੇ ਲੋਕ ਵਿਦੇਸ਼ ਯਾਤਰਾਵਾਂ ਜਾਂ ਸਮੁੰਦਰੀ ਯਾਤਰਾਵਾਂ ਤੇ ਹਨ ਸਿਰਫ ਉਨ੍ਹਾਂ ਲੋਕਾਂ ਨੇ ਵੋਟਿੰਗ ਨਹੀਂ ਕੀਤੀ| ਏਜੰਸੀ ਨੇ ਦੱਸਿਆ ਕਿ ਬੀਮਾਰ ਅਤੇ ਬਜ਼ੁਰਗ ਲੋਕਾਂ ਨੇ ਮੋਬਾਈਲ ਵੋਟਿੰਗ ਕੇਂਦਰਾਂ ਤੇ ਵੋਟ ਪਾਈ| ਇੱਥੇ ਦੱਸ ਦਈਏ ਕਿ ਉੱਤਰੀ ਕੋਰੀਆ ਵਿਚ ਹਰੇਕ 4 ਸਾਲ ਵਿਚ ਸੂਬਾਈ, ਸ਼ਹਿਰੀ ਅਤੇ ਕਾਊਂਟੀ ਅਸੈਂਬਲੀਆਂ ਦੇ ਨੁਮਾਇੰਦਿਆਂ ਦੀ ਚੋਣ ਲਈ ਵੋਟਿੰਗ ਹੁੰਦੀ ਹੈ|ਕਿਮ ਨੇ ਉੱਤਰੀ ਹਾਮਗਓਂਗ ਸੂਬੇ ਵਿਚ ਵੋਟਿੰਗ ਕੇਂਦਰ ਤੇ ਦੋ ਉਮੀਦਵਾਰਾਂ ਜੁ ਸੋਂਗ ਹੋ ਅਤੇ ਜੋਂਗ ਸੋਂਗ ਸਿਕ ਦੇ ਪੱਖ ਵਿਚ ਵੋਟ ਪਾਈ| ਦੋਵੇਂ ਹੀ ਕਾਊਂਟੀ ਅਸੈਂਬਲੀ ਲਈ ਚੋਣ ਲੜ ਰਹੇ ਸਨ|